مقالات مشابهة
⛓الوضع المأساوي داخل جحيم السجون المصرية 🔥🔥⛓
🖌 بقلم أحد الأسرى المعتقلين فرج الله عنهم هذا العذاب
👇
🔥 الصيف في السجن كان حقيقي جحيم، وفي فترات فيها موجات حارة…كان حرفيًا هيجيلي انهيار عصبي.
♨️ كنا ف وادي النطرون بنكون 25 واحد ف زنزانة نصيب الواحد 30 سنتي ونايمين حشر وتلزيق في بعض ومروحة السقف والشفاط الكحيان وجودهم زي عدمه.
🔺حمام واحد علينا كلنا، من كتر العذاب والعرق اللي مش بيقف اضطرينا نعمل قانون ان الواحد ليه حد أقصى 5 دقايق يستحمى فيهم وبقى في واحد واقف بالستوب ووتش يحسب لكل واحد واللي يتأخر يتعاقب ويرجع لآخر الدور، وصلنا لمرحلة غريزة النجاة المجردة كأننا في غابة.
🔺بتستحمى وانت بتجري ورا نفسك عشان متتعاقبش وتطلع تحجز دور تاني بسرعة عشان تلحق اللفة اللي بعدها اللي هتكون غرقت عرق لحد ما دورك ييجي فيها.
🔺أنا عندي مشكلة ف العرق وبعرق بزيادة، كانت فترة الصيف حرفيًا تعذيب، من كتر العرق جلد ضهري كله حصل فيه جفاف وشقق مهما كنت بشرب مياه، وكنت بغير بال5 تشيرتات ف اليوم الواحد فيهم بقلعه يتعصر كأنه كان متغرق ف مياه. اخر ما تعبت ومش عارف أغسل وهدومي خلصت خليت أهلي يجيبولي فوط زيادة وبقيت أنام على ضهري طول اليوم لافف جسمي من فوق بفوطة عشان العرق وبذاكر وأنا نايم عشان وشي يبقى تحت جزء م المروحة، ومش بلبس التشيرت غير قبل ما أتحشر وأنام وأصحى الصبح أقلعه غرقان وأحط مكانه الفوطة.
💥الصيف ف السجن لا يحتمل: أمراض جلدية، حر مرعب يسبب جفاف للجلد، المياه داخل السجن مياه ساخنة مولعة بتحرق أكتر ما بتروي، حتى النفس مكتوم ومش بنعرف ناخده.
♨️الصيف ف السجن لا يحتمل، ومحدش جوه بيستحمله،تذكرونا دائماً واسعوا لفكاك أسرنا فنحن في عذاب وجحيم اللهم اكشف عنا ما نحن فيه من بلاء
